Hwb ariannol yn helpu Tillery Action for You i ddatblygu cyfleoedd i wirfoddolwyr

Mae menter gymdeithasol ym Mlaenau Gwent yn bwriadu ehangu ei gyfleoedd gwirfoddoli diolch i gyllid gan Gomisiynydd yr Heddlu a Throsedd.

Mae Tillery Action for You (TAFY) yn darparu cyfleoedd gwirfoddoli, treialon gwaith, cyflogaeth drosiannol a phrentisiaethau i bobl yn ac o gwmpas Blaenau Gwent.

Mae'r sefydliad yn darparu prosiectau amgylcheddol ledled y sir ac ar hyn o bryd mae'n cefnogi rhyw 150 o wirfoddolwyr. Y bwriad yw datblygu ei wirfoddolwyr i 250 dros y tair blynedd nesaf.

Yn ddiweddar mae wedi cymryd safle newydd ar brydles yn Cwm Meadows, gyda'r nod o dyfu bwyd i'w ddosbarthu i breswylwyr lleol sydd ei angen, yn ogystal â chreu pyllau dŵr a man cymunedol. Yn ogystal, mae'r sefydliad yn darparu gweithdai sy'n dysgu sgiliau DIY a sgiliau sylfaenol cynnal a chadw cerbydau.

Meddai Comisiynydd yr Heddlu a Throsedd Jane Mudd: "Mae Tillery Action for You yn gwneud gwaith gwych yn y gymuned, yn creu cyfleoedd i bobl ddysgu sgiliau newydd, rhoi cynnig ar bethau newydd, a chyfrannu i'w hardal leol.

"Yn hollbwysig, mae'n creu cyfleoedd i'r rheini a allai fel arall gael anawsterau gydag addysg neu gyflogaeth ganolbwyntio ar brosiectau cymunedol a chymryd perchnogaeth o'u hardal leol."

Mae'r prosiect yn cefnogi'r blaenoriaethau a amlinellir yng Nghynllun yr Heddlu, Trosedd a Chyfiawnder y Comisiynydd ac mae'n cael ei ariannu'n rhannol gan arian sydd wedi cael ei adfeddu o enillion troseddol. Gall grwpiau cymunedol wneud cais am grantiau rhwng £1,000 a £50,000 i gefnogi mentrau lleol.

Yn ogystal ag ennill hyder, sgiliau a chymwysterau, mae TAFY yn cynnig cludiant dwy ffordd i wirfoddolwyr i'r prosiectau er mwyn sicrhau nad oes unrhyw un yn cael ei eithrio.

Meddai Neil Hirst o TAFY: “Rwyf eisiau diolch i Gomisiynydd yr Heddlu a Throsedd am ei holl gefnogaeth. Er mwyn cynnal prosiectau gwirfoddoli llwyddiannus mae angen i ni gyflogi staff yn ogystal â thalu llawer o gostau eraill.

"Bydd y cyllid gan y Comisiynydd yn ein helpu ni i greu mwy o gyfleoedd i bobl leol, cael mwy o bobl yn ôl mewn gwaith, a gwella'r amgylchedd i holl drigolion Blaenau Gwent."