Mae Comisiynydd yr Heddlu a Throsedd Jane Mudd yn croesawu ymrwymiad Llywodraeth y DU i fynd i'r afael â throseddau cyllyll

Mae Comisiynydd yr Heddlu a Throsedd Jane Mudd wedi croesawu ymrwymiad Llywodraeth y DU i haneru troseddau cyllyll yn ystod y degawd nesaf.

Gwnaeth yr Ysgrifennydd Cartref, Yvette Cooper, yr addewid yng nghynhadledd y Blaid Lafur yn Lerpwl ac addawodd y byddai'r llywodraeth yn cyflwyno deddfau newydd i fynd i'r afael â gwerthu cyllyll ar-lein i blant. 

Ymrwymodd hefyd i fynd i'r afael â'r gangiau troseddol sy'n camfanteisio ar blant a phobl ifanc, a buddsoddi mwy o arian mewn hybiau ieuenctid i'w harwain i ffwrdd o droseddu a thrais.

Dywedodd Comisiynydd yr Heddlu a Throsedd, Jane Mudd: "Rwy'n croesawu'r ymrwymiad cryf gan Lywodraeth y DU i fynd i'r afael â throseddau cyllyll yn ein cymunedau.

"Er bod achosion o droseddau cyllyll yng Ngwent yn parhau i fod yn isel, rwy'n ymrwymo'n gryf i fynd i'r afael â'r mater hwn. Roeddwn yn falch o weithio gyda Heddlu Gwent i ddod â'r Angel Cyllyll i'n cymunedau ac i ariannu'r elusen Fearless sy'n ymweld ag ysgolion a grwpiau ieuenctid i gyflwyno gweithdai ar beryglon cario cyllyll.

"Mae hon yn broblem gymdeithasol sydd angen mwy na dull cyfiawnder troseddol yn unig, ac roeddwn yn arbennig o falch o weld ymrwymiad i ariannu mwy o fentrau ieuenctid a fydd yn helpu i arwain plant a phobl ifanc i ffwrdd o'r llwybr troseddu ac ymddygiad gwrthgymdeithasol. Mae hyn yn rhywbeth rydym yn ei gymryd o ddifrif yma yng Ngwent, gyda chronfa gymunedol wedi'i sefydlu i ddarparu gwasanaethau dargyfeirio a chymorth i blant a phobl ifanc ar draws y rhanbarth.

"Rhaid i ni wneud popeth o fewn ein gallu i annog plant a phobl ifanc i beidio â chario cyllyll ac mae'r addewidion hyn gan Lywodraeth y DU yn gam calonogol i'r cyfeiriad cywir."