Galw ar bobl ifanc!
Rydym yn annog pobl ifanc ledled Gwent i gymryd rhan mewn arolwg ar-lein byr i helpu i nodi'r materion sy'n bwysig iddynt.
Bydd y themâu a nodir yn cael eu defnyddio i helpu i lunio Hawl i Holi Ieuenctid 2022 Swyddfa Comisiynydd yr Heddlu a Throsedd.
Bydd y digwyddiad Hawl i Holi yn cael ei gynnal dydd Iau 10 Mawrth o 4.30pm tan 6.30pm gan bobl ifanc o Fforwm Ieuenctid Rhanbarthol Gwent, mewn partneriaeth â Swyddfa Comisiynydd yr Heddlu a Throsedd.
Bydd panel o weithwyr proffesiynol o amrywiaeth o wasanaethau wrth law i wrando ac i ateb cwestiynau ar bynciau llosg.
Bydd yr arolwg yn helpu'r grŵp cynllunio i ddeall pa faterion sy'n bwysig i bobl ifanc ac yn helpu i lunio aelodau'r panel.
Meddai Comisiynydd yr Heddlu a Throsedd Gwent, Jeff Cuthbert: "Mae barn pobl ifanc yn eithriadol o bwysig i mi.
“Mae digwyddiadau fel Hawl i Holi Ieuenctid yn cynnig llwyfan unigryw i weithwyr proffesiynol, gwneuthurwyr polisi ac aelodau'r gymuned ddeall beth sydd yn bwysig i bobl ifanc.
"Dim ond trwy weithio mewn partneriaeth gyda phobl ifanc y byddwn yn deall yr hyn sydd ei angen er mwyn gwneud gwahaniaeth i bobl ifanc yn awr ac yn y dyfodol."
I gael rhagor o wybodaeth, cysylltwch â: commissioner@gwent.police.uk